Al-Amin Kimathi ashtakiwa kwa kuchochea ghasia Kenya

NAIROBI,

Kiongozi mwanaharakati wa kiislamu nchini Kenya , Al-Amin Kimathi, leo (Jumanne) amefunguliwa mashtaka  ya kujihusisha na ghasia kufuatia vurugu zilizotokea wiki iliyopita katikati ya mji mkuu wa nchi hiyo, Nairobi.
Kimathi anashutumiwa kwa kuhusika na maandamano ya Ijumaa iliyopita kupinga kurejeshwa kwao kwa muhibiri wa dini ya kiislamu kutoka Jamaica, Sheikh Abdullah al-Faisal. Kwa mujibu wa shirika la habari la Uingereza, Reuters, limesema kuwa, Kimathi alikamatwa jana (Jumatatu) katika mahakama kuu ya Nairobi ambako watuhumiwa kadhaa wa ghasia hizo walikuwa wakisomewa mashtaka yao.
Wakati huo huo, Waziri wa Mambo ya Nje wa Kenya, Moses Wetangula, amesema kuwa nchi hiyo imefanikiwa kupata ndege ya kumrejesha kwao mhibiri huyo wa kiislamu na kwamba hatua hiyo itafanyika mnamo siku mbili zijazo.

UPORAJI MALI NA GHASIA VYASHAMILI HAITI

PORT-AU-PRINCE

Wakati misaada zaidi ikiendelea kumiminika nchini Haiti kwa wahanga wa tetemeko la ardhi, vitendo vya uporaji na ghasia vimeshamiri katika mitaa ya mji mkuu wa nchi hiyo, Port-au-Prince, uliOpigwa na tetemeko hilo hivi karibuni.

Mamia ya watu waliokuwa na hasira ya kutokuwa na chakula walivamia maduka yaliyoharibiwa na tetemeko hilo na kupora bidhaa mbalimbali, huku wengine wakipigana kuwania bidhaa hizo.

Umoja wa Ulaya umetangaza msaada wa kiasi cha Euro nusu bilioni. Nalo Baraza la Usalama la Umoja wa Mataifa hii leo linategemewa kuidhinisha pendekezo la kupelekwa kikosi cha askari wa ziada wa umoja huo 3,500 nchini Haiti katika kujaribu kukabiliana na matukio hayo ya uporaji.

Akizungumza mara baada ya kuzuru mji mkuu huo wa Haiti, Katibu Mkuu wa Umoja wa Mataifa, Ban Ki-moon, amesema kuwa wananchi wa Haiti wanahitaji msaada wa haraka.

Na inakadiriwa kuwa huenda idadi ya watu waliokufa kutokana na tetemeko hilo ikafikia watu laki mbili, huku maelfu kadhaa wakiwa hawana makazi.