MJUE MWIMBAJI MAHIRI WA MUZIKI WA INJILI KABULA.J.GEORGE

“Huduma ya uimbaji wa muziki wa injili ni sawa na huduma inayotolewa na Wachungaji, Wainjilisti na Mitume na Manabii. Nasema hivyo nikimanisha kwamba mwimbaji anapokua akiimba wako watu wengi wamekuwa wakiokoka kwa njia ya uimbaji. Hivyo huduma hii inatakiwa kuheshimiwa kama huduma zingine za kiroho. Nasikitika kwamba makanisa yanashindwa kuwatumia waimbaji wa muziki wa injili kwa kuwaona ni watu wa kawaida kumbe nao ni wahubiri.

Kwa kudhihilisha hilo ndio maana leo hii huwezi kusikia mkutano wa neno la Mungu unatangazwa mahali usisikie kwamba waimbaji kadhaa watakuwepo kwa ajili ya kutoa huduma hiyo kwa njia ya uimbaji. Waimbaji pia wamekuwa wakisafiri sehemu mbali mbali kwa ajili ya kutoa huduma hiyo ya kulitangaza neno la Mungu kwa njia ya uimbaji”.

Hivyo ndivyo alivyoanza kusema mwimbaji mahiri wa muziki wa injili nchini Kabula John George alipokuwa akizungumza na safu hii jijini Dar es Salaam. Kabula J.George ni mwimbaji wa nyimbo za injili hasa nyimbo za kusifu na kuabudu.

Kabula alizaliwa tarehe 26 April 1980 katika kijiji cha Kimiza Wilayani Kwimba mkoa wa Mwanza. Mwimbaji huyo ambaye kwa sasa ameliteka jiji la Dar es Salaam kutokana na wimbo wake wa ‘PESA’ alianza shule ya msingi mwaka 1990 katika shule ya Kimiza kabla ya kuhamia shule ya msingi Mzinga Jeshini iliyopo mkoani Morogoro na kuihitimu mwaka 1996.

Alianza huduma ya kuimba akiwa darasa la tatu katika shule ya msingi Kimiza. Wakati huo alikuwa akienda na mama yake kanisani la Roma Kimiza na alikuwa akiimba katika kwaya ya wadogo mpaka alipohamia Morogoro.

Baada ya kumaliza masomo alihamia Dar es Salaam ambapo alifanikiwa kujiunga na kwaya ya Uinjilisti ya KKKT Tabata Kinyerezi hiyo ikiwa ni mwaka 2005. Hata hivyo Kabula hakudumu sana katika kwaya hiyo aliamua kuanza huduma ya uimbaji kama mwimbaji binafsi na kufanikiwa kureko albam aliyoipa jina la AMANI.

Mwaka 2005 Kabula aliamua kuachana na ukapela na kuamua kuolewa. Baada ya kufunga ndoa Kabula alianza kuimba pamoja na mumewe. Akiwa ndani ya ndoa Kabula kwa kushirikiana na mume wake George Kayala aliamua kuifanyia marekebisho albam yake ya Amani kwa kurudia baadhi ya nyimbo na kuongeza nyingine mpya. Nyimbo alizofanyia marekebisho ni Nkomoji ulioimbwa kwa lugha ya Kisukuma wenye maana ya Mkombozi. Milele, Tanzania na Tunakulilia

Kuna siri kubwa katika uimbaji, ni zaidi ya kusikiliza ala za muziki na sauti nzuri ya muimbaji, Uimbaji unaomgusa Mungu lazima utawagusa na watu pia, watu wataokoka, wataponywa na watagangwa mioyo yao kupitia uimbaji. Ni imani yangu kuwa mwimbaji bora wa nyimbo za injili ni yule kwanza awe ameokoka kweli na mwenye lengo kweli la kuwafikia watu wa Mungu au wa mataifa katika kuwapa neno la Mungu na kuwaasa waache anasa na si kwa lengo lingine lolote hapo liwe la kufanya biashara au kujulikana kwa watu.

Mwimbaji wa muziki wa injili Kabula John George ni mtumishi wa Mungu anayefanya kazi hiyo kupitia kipawa chake alichopewa na Mungu. Tayari amefafanikiwa kutoa albam ya nyimbo za injili inayojulikana kwa jina PESA na inasambaza na Mam Store.
Watu wengi wamezipenda nyimbo zake kutokana na ujumbe mzuri uliomo na radio mbali mbali za kidini zinacheza nyimbo hizo. Radio ambazo kwa sasa zinapinga nyimbo za dada Kabula ni Wapo Radio, Prise Power zote za Dar es Salaam, Radio Safina ya Arusha na Radio Sauti ya Injili Moshi.
Kabula ambaye kwa sasa wanamuita Mama Pesa kutokana na wimbo wake wa PESA aliouimba kwa mahadhi ya zuku anatoa huduma mbalimbali katika makanisa ya mkoa wa Dar es Salaam na yupo tayari kutoa huduma hiyo ndani na nje ya mkoa wa Dar es Salaam ikiwa ni pamoja na nje ya nchi.
Mwimbaji huyo amekuwa akiwagusa watu wengi wanaozisikiliza nyimbo zake hizo na wamekuwa wakimwalika katika mikutano mbalimbali kwa ajili ya kutoa huduma hiyo ya kuhubiri neno la Mungu kwa njia ya Uimbaji.
Dada Kabula anawakaribisha watumishi wote wa Mungu kumwalika katika semina, mikutano, makongamano n.k kwa ajili ya kulitangaza neno la Mungu wetu kupitia huduma hiyo ya uimbaji.
Nyimbo zilizo katika albam hiyo ni:-
1. Milele
2. Pesa
3. Ninamjua
4. Nkomoji (wimbo wa Kisumuma)
5. Tanzania
6. Tunakulilia
7. Yatima
8. Nakupa utuku na
9. Niguse.
Kabula anaabudu katika kanisa la Glory Temple Tabata kwa mchungaji James Mwaipyana jijini Dar es Salaam. Mwimbaji huyo kwa sasa anajiandaa na kurekodi mkanda wa video wa albam hiyo ambayo inatarajiwa kukamilika muda wowote kuanzia sasa.
Kwa mawasiliano zaidi mpigie simu no:- 0757- 140 336 au 0755 – 240 136
Ama kwa njia ya Email- kabulageorge@yahoo.com
Yupo tayari kufanya nawe huduma mahala popote pale kwa lengo la kumtangaza Mungu.