SHUSHO KUNOGESHA UZINDUZI WA SAUTI ZA SIFA

Mwimbaji wa muziki wa Injili nchini, Christina Shusho anatarajiwa kunogesha uzinduzi wa albamu mbili kwa mpigo za kwaya ya nyimbo za kusifu na kuabudu iitwayo Sauti za Sifa ya Huduma ya The Word of Reconciliation Ministries (WRM) iliyopo Matembele ya Pili Kivule jijini Dar es Salaam.

Akizungumza na TGM leo jijini Dar es Salaam, mwalimu wa kwaya hiyo Elibariki Isango alisema kuwa Shusho amethibitisha kushiriki katika uzinduzi huo ambao alidai utakuwa wa kihistoria katika eneo hilo.

“Shusho amekubali kuja kutuunga mkono katika uzinduzi huo unaotarajiwa kufanyika Agosti 25 mwaka huu ndani ya Ukumbi wa WRM kuanzia majira ya saa nne asubihi,” alisema Isango.

Isango alizitaja albamu hizo kuwa ni Heshima na Utukufu na Enendeni kwa Roho zikiwa katika mfumo wa CD na hakutakuwa na kiingilio siku hiyo.

Aliongeza kuwa mbali na Shusho waimbaji wegine wa muziki huo kutoka na Dar es Salaam na Arusha wataimba na sasa anafanya mazungumzo nao na mambo yakiwa tayari atawajulisha wadau wa muziki huo.

Isango alimaliza kwa kusema kuwa fedha zitakazopatikana katika uzinduzi huo zitatumika kumalizia ujenzi wa jengo la huduma hiyo ambalo lipo katika hatua za mwisho za kukamilika.