CHAPANYOTA: JULAI 21 ITAKUWA SIKU YA KUKUMBUKWA MBEYA

Mwimbaji wa nyimbo za injili nchini, Ambele Chapanyota amesema kuwa Julai 21, 2013 itabaki kuwa siku ya kukumbukwa kwa wakazi wa mkoa wa Mbeya ambapo ataimba vibao vyake vyote na vingine ambavyo havijawahi kusikika popote pale katika uzinduzi wa DVD ya Nitang’ara Tu ya Mwinjilisti Kabula George.

Chapanyota mwenye maono ya kuibadilisha jamii ya Tanzania kwa njia ya uimbaji na kuhubiri neono la Mungu alisema kuwa kwa sasa anafanya maandalizi makali yeye na vijana wake ambao wamekuwa wakilitawala jukwaa kwa nguvu zote.

“Julai 21, 2013 itabakiwa siku ya kukumbukwa kwa wakazi wa Mbeya watakaofika katika uzinduzi wa Mwinjilisti Kabula utakaofanyika katika Kanisa la Moravian Usharika wa Yerusalem maeneo ya Airport kwani kuna vitu vikali ambavyo sijawahi kuvionesha popote pale siku hiyo nitavionesha,” alisema Chapanyota.

Chapanyota amewataka wakazi wote wa mkoa wa Mbeya siku hiyo kufika kwa wingi katika uzinduzi huo ambao ni wa kwanza kufanywa na mwinjilisti Kabula hivyo ni vema wakaonesha ushirikiano wa kujumuika kwa pamoja kwa ajili ya kufanikisha shughuli hiyo.

Mwimbaji huyo anayetamba na albamu zake mbili SALAMA KWA YESU na  YESU TU amemaliza kwa kusema kuwa siku hiyo siyo ya kukosa kwani hatapenda kuona mtu anasimuliwa kile atakachokifanya katika ukumbi huo.