Ayubu John; Dereva wa gari anayeendesha maisha kwa nyimbo za Injili

KATIKA miaka ya hivi karibuni, Muziki wa Injili umekuwa ni mkombozi kwa vijana na jamii kwa ujumla, hii ni kutokana na msaada wake katika kupunguza tatizo la ajira, pia ukitumika kama silaha ya kubadili tabia za wanajamii walio wengi.

Huduma hii imekuwa ikifanywa zaidi na vijana, imeendelea kuwa ni kiunganishi kikubwa baina ya jamii moja na nyingine hivyo kuchangia kujenga taifa imara lenye mwelekeo wa kumjua Mungu.

Ayubu John ambaye ni muimbaji wa nyimbo hizo, anasema kwamba kuna mambo kadhaa ambayo daima wanakuwa wakiyafanya kwa nia ya kuhakisha kuwa Tanzania na Afrika kwa ujumla inakuwa na mabadiliko kwa njia ya muziki wa Injili.

"Hii ni huduma muhimu katika kueneza Neno la Mungu, wapo watu wanaopokea ujumbe na kubadilika kwa njia tofauti ikiwemo, mahubiri Kanisani au kwenye mikusanyiko lakini wapo wengine wanaotegemea kupota ujumbe kwa njia ya uimbaji.

"Kwa sababu hii najiona kuwa mimi kama muimbaji wa nyimbo za Injili nina kazi ya ziada ya kuhakikisha kuwa jamii inayonizunguka inapata ukombozi na kubadilika kama ambavyo neno linavyosema," aliongeza Ayubu.

Muimbaji huyo ambaye kwa taaluma ni dereva, anasema kuwa katika maisha yake ya awali hakujua kuwa siku moja angweza kuja kuwa moja ya watu muhimu kwenye jamii ila siku moja Mungu alimuita ili amtumikie katika huduma hii.

Kazi yake alianza kufanya mwaka 2003 huku akieleza kuwa kulikuwa na vikazo vingi ambavyo aliamini kuwa vingeweza kumfanya ashindwe kuendelea mbele ingawa hakukata tamaa ila aliendelea kujituma kwa kuwa aliamamini kwamba ilikuwa ni sehemu ya maisha katika kumtumikia Mungu, kwa sababu hata Ibrahim baba wa imani na Ayubu washawahi kujaribiwa na walishinda majaribu hayo.

Tangu wakati huo aliendelea kufanya huduma hiyo, jambo lililomlazimu kuachana na kazi ya udereva ili kupata muda mwingi zaidi wa kumtumikia Mungu kwa njia ya uimbaji.

"Nimelazimika kuachana na kazi ya udereva ili niweze kufanya huduma yake kikamilifu, huu kwangu ulikuwa ni wakati mugumu maishani lakini kwa vile ulikuwa ni wito nililazimika kuukubali ingawa kwa sasa mambo yamebadilika kwa sababu Mungu amenibariki na kunipa kila ninachohitaji," ameongeza nyota huyo.

Kwa sasa Ayubu ana albamu mbili ambazo ni Nikifika Juu Mbinguni na Kesheni Mkiomba. Katika albamu ya kwanza imebeba jumla ya nyimbo kumi ambazo ni Nikifika Mbimbuni, Akili, Ni Hali gani, Yesu Nitakutukuza, Mungu Ulisema na Nikifika Mbinguni iliyobeba jina la albam.

Kazi ya pili nayo inajumla ya nyimbo 10, ambazo ni Acha Kulia, Mwenye Nyumba, Asante Yesu Asante Mungu na nyingine nyingi ambapo kwa sasa amehamishia makazi yake nchini Kenya katika jiji la Nairobi.

Akileelezea ujumbe wake kwa waimbaji wa Tanzania, Ayubu anasema kuwa wanatakiwa kujitambua kuwa wao ni watumishi wa Mungu na kazi kubwa waliyokuwa nayo ni kuhakikisha kuwa jamii inabadika.

Ameongeza kuwa kwa sasa kazi zake hizo anatarajia kuzifanyia uzinduzi baadaye mwaka huu ili kutambulisha huduma hiyo kwa jamii anayoitumikia.