SARAH AOMBA ALIYEVUMISHA KIFO CHA BAHATI ASAKWE

SARAH SANGA

Mwimbaji wa nyimbo za injili nchini Sarah Sanga anayetesa na kibao cha Simama Baba Unitete, amelitaka jeshi la polisi nchini kumtafuta mtu aliyevumisha uzushi kuwa, Bahati Bukuku amefariki dunia kwa ajali wakati anatokea mkoani Mbeya.

Akizungumza na TGM jana jijini Dar es Salaam, Sahar alisema kuwa mtu aliyeeneza taarifa  hizo ni sawa na mtu yeyote anayetishia kuua na hilo ni kosa la jinai hivyo ni vizuri akasakwa ili sheria ishike mkondo wake.

“Nalitaka jeshi la polisi limsaka mtu aliyevumisha kifo cha Bahati kwani kimewashtua watu wengi na hilo pia ni kosa la jinai kwani ni sawa na kwamba ametishia kuua kwa njia ya maneno hivyo ni bora akatafutwa,” alisema Sarah.

Sarah alisema kuwa polisi wanauwezo wa kulifanyia kazi hilo hasa kwa kuchunguza ujumbe huo wa simu uliokuwa unasambazwa kwa njia ya simu ulianzia kwa nani na huyo ndiyo anaweza kusema kukweli wa nani aliyevumisha tukio hilo.

Mwanzoni mwa wiki hii kuna uvumi ulienezwa kila kona ya nchi kwa njia ya simu za mkononi na mitandano ya kijamii kama blog na facebook kuwa Bahati Bukuku alifariki baada ya kupata ajali mbaya wakati anatoka mkoani Mbeya.

Bahati alipotafutwa kuzungumzia suala hilo alikiri naye kupokea habari kama hizo na hakujua ni nani alizieneza na kudai kuwa yote anamwachia Mungu kwani yeye ndiye anayejua mwisho wa uhai wake.

Wakati huo huo, Saraha amewataka wadau wa muziki wa injili kujipatia nakala za albamu yake ya Simama Baba Unitetea ambayo ameisambaza kwenye maduka mbalimbali jijini Dar es Salaam.

“Baada ya kutoa albamu yangu nilipokea maombi mengi ya watu wakiomba kuipata nami nimesikia ombi langu na nimeamua kuisambaza katika maduka mbalimbali jijini Dar es Salaam hasa Kariakoo ikiwa na nyimbo nane,” alisema Sarah.

Alizitaja nyimbo zinazounda albamu hiyo kuwa ni Simama Baba Unitetee, Haleluya, Anajibu Maombi, Yesu Napiga Saluti, Tanzania, Mwana wa Adamu, Moyo wa Wangu na Siku za Mwisho.