Jennifer Mgendi atema cheche kwa majangiri wa sanaa

Mkongwe wa muziki wa Injili nchini Jennifer Mgendi ametema cheche kali kwa majangiri wanaojihusisha na shughuli ya kudurufu CD,VCD na DVD  na filamu za wasanii wa fani mbalimbali na kuziuza bila idhini yao huku wakiwaacha wahusika wakiambulia vijisenti vidogo kutoka kwa wasambazaji wa kazi zao, ishu kamili anatelemka nayo  Hemed Kisanda.

Akiteta na safu hii hivi karibuni, Jennifer alisema kuwa, ili kukomesha ujangiri huo, waimbaji wote wa muziki wa Injili yawapasa kushikamana na kuunda mtandao nchini nzima ambao utashughulika na kuwakamata wamachinga wanaouza kazi hizo na kwa kufanya hivyo, watafanikiwa kudhibiti wimbi hilo ambalo limewatajirisha watu wasiotoa jasho lolote zaidi ya kukaa ofisini mwao na kuanza kudurufu CD,VCD na DVD.

Jennifer anayetesa na albamu yake mpya ya Kiu ya Nafsi  alisema kuwa, yupo katika hatua za mwisho za kukamilisha  mwendelezo wa filamu ya TEKE LA MAMA (Part II) yenye mafundisho kwa ajili ya watu wa rika zote na inatarajiwa kuwa tarari mwezi Machi mwaka huu.

Mbali na Part II ya filamu ya Teke la Mama, muvi zake zingine ni pamoja na  ‘Joto la Roho’ ya mwaka 2004 na ‘Pigo la Faraja’ ya 2005, na washiriki wote waliocheza filamu ya kwanza ya Teke la Mama ndiyo watakaoendelea na nafasi zao.